Isa 37 | ZomZIV | STEP | Kumpi Hezekiah in hih thu a zak ciangin a puante balkek a ippi puan silhin TOPA biakinnpi ah a pai hi.

Isaiah 37

Jerusalem Hut ding Genkholhna

1 Kumpi Hezekiah in hih thu a zak ciangin a puante balkek a ippi puan silhin TOPA biakinnpi ah a pai hi. 2 Amah in kumpi inn ukpa Eliakim, thuvanpipa Shebna, le siampi makaite in a vekun ippi puan silhsa in Amoz tapa kamsangpa Isaiah kiangah a sawl hi. 3 Amaute in, “Hezekiah in, ‘Tuni lungdon ni, tai thuak ni, mindai ni, nau suak ding tha nei lo-a a suakkhia zo lo bang i hi hi. 4 A pu Assyria kumpipa in a sawl galkap mangpa in a nungta Pasian a simmawhna kammalte TOPA note Pasian in za dinga, TOPA note Pasian in a zaksate hangin amah tai ding hi. Tua ahi ciangin a suakta a omlai sunte pana a baanglaite adingin thu ngen un,’ ci hi,” a ci uh hi. ^a

5 Isaiah kiangah kumpi Hezekiah uliante a tun uh ciangin amaute kiangah 6 Isaiah in, “Na pu uh kiangah, ‘TOPA thugen hih ahi hi: Na zaksate uh hangin lau kei un - tua Assyria kumpipa kam a gensawnte in kei hong daisak ahi hi. 7 Ngai un, amah in thuzaksaknate a zak ciangin a gamah ciah a tua lai-ah namsau-in ka satpuk nadingin a sungah kha khat ka guan hi, ci hi,’ ci-in gen un,” a ci hi. ^b

8 Galkap mangpipa in Assyria kumpipa thu a zak khit ciangin Lachish nusia-in nung kik a, kumpipa in Lipnah a sim a mu hi. ^c

9 Tu-in Sennacherib in, Egypt kumpipa, Cush ^{▼▼37.9 Tua pen Nile gunnak kual pan} mi Tirhakah amah sim dingin a kuanna thu a za hi. Hih thu a zak ciangin amah in Hezekiah tungah kamtai sawl a, 10 “Judah kumpipa Hezekiah kiangah: Na muanpa ‘Assyria kumpipa khut sungah Jerusalem kipia lo ding hi’ a ci na pasian in nang hong khem hi. 11 Hi takpi hi, Assyria kumpite in gam khempeuha a hihsa a suksiat kiuhkeuh lam na za khin hi. Tua hi-a nang hong kihu tuan ding ahi hiam? 12 Minamte pasiante - Gozan, Haran, Rezeph le Tel Assar a om Eden mite pasiante in ka pute uh suksiatsate hu zo uh ahi hiam? 13 Hamath kumpipa, Arpad kumpipa Sepharvaim khuapi kumpipa ahikeh Hena ahikeh Ivvah kumpipa-te koi-ah om ta uh ahi hiam?” a ci uh hi. ^e

Hezekiah’ Thungetna

14 Hezekiah in kamtaite tung panin a laikhak ngah a sim hi. Tua ciangin TOPA biakinnpi ah paito in TOPA mai-ah a zal hi. 15 Tuateh Hezekiah in TOPA tungah thu ngen a: 16 “Thahatpen Cherub-te kikala tu TOPA Israel Pasian aw, leitung kumpi gam khempeuh tungah nang bek Pasian na hi hi. Leitung le vantung na bawl khin hi. 17 TOPA aw, na bil hong ngat inla hong za in; TOPA aw, hak inla hong mu in; Sennacherib in a nungta Pasian a zahkona kammalte khempeuh za in.

18 “TOPA aw, Assyria kumpite in amaute gam le a mite a siatsakna a maan ahi hi. 19 Amaute in pasian ahi lo amau pasiante mihing khuta kibawl sing le suang hi lel ahi manin meikhuk ah pai-in a susia uh hi. 20 TOPA kote Pasian aw, tu-in leitunga kumpi-gam khempeuh in TOPA aw, nang bek Pasian ^{▼▼37.20 Si Tuipi Laizial (2Ku.19:19 zong en in); Masoretic Bupi ah nang} na hilam a theih nadingun ama khut panin hong hukhia in,” a ci hi.

Sennacherib Pukna

21 Tua ciangin Amoz tapa Isaiah in Hezekiah tungah thu puaka: “Hih in TOPA Israel-te Pasian gen ahi hi: Assyria kumpipa tawh kisai kei tungah thu nong ngetna hangin 22 hih in ama tungah TOPA gensa kammal ahi hi:

“Zion Tanu Bit in
nang hong simmawhin hong zahko hi.
Jerusalem Tanu in na tai laitakin
a lu hong peisan hi.
23 Na zahko a na daisak kua ahi hiam?
Kua langah na aw sangsakin
na kiphatsakna mit tungliik na hi hiam?
Israel-te Siangtho Pa langah maw! ^g
24 Na kamtaite zangin
TOPA na zahkona na uanglua mahmah hi.
Tuateh nang in,
‘Ka sakolleng tampite-in
asanna mualdawnte le Lebanon mualdawn kui ah
ka kahto khin hi; ^h
a tamtak sangpente a
takkung hoih pente ka phuk khin hi.
A sangpenna adawn kui-a
tulak hoihpenna mun ka tung khin hi.
25 Gamdangte ^{▼▼37.25 Si Tuipi Laizialte (2Ku. 19:24 zong en in); Masoretic Bupi ah gamdang gamte ah cih nei lo hi.} ah tuikhuk ka to khina,
tua lai-ah tui ka dawn khin hi.
Ka khepekte nuai tawh
Egypt luite khempeuh ka keusak hi,’ na ci hi. ^j
26 “Za nai lo na hi hiam?
Sawtpi-a ka kipsaksa ahi hi. ^k
Tanglai pekin hih dinga ka ngimsa hi a,
tu-a ka tunsak hi-in nang in
khuapi muanhuaite
suangtum hon lak na suaksak hi. ^l
27 Amau mite, a vang uh kiama
a lung uh kia-in a maizum uh hi.
Amaute lo lai-a kungnote,
lopa hing ngekte,
innkhum tunga po a khankhit ma-a kausan ^{▼▼37.27 Masoretic Bupi khutgelh pawlkhat, Si Tuipi Laizial le Masoretic khutgelh a tamzaw ah inntung / le leicial lote}
lopate tawh kibang uh hi. ⁿ
28 “Ahi hangin na tenna mun,
na paisuk na pai tohna ah
kei nong hehsaknazia ka thei hi. ^o
29 Kei nong hehsakna hang le
nong thusimlohna ka zakna hangin
na nakah sikkawi kong bulh dinga
na kamah kamkaih kong bulh dinga
nong kuanna lampi ah
kong ciahsak kik ding hi. ^p

30 Hezekiah aw, hih in nang adingin lim ahi ding hi: ^q

“Tu kumin anli pote na ne ding uh a,
a kum nihna ah tua bangmah na ne ding uh hi.
Ahi hangin a kum thumna kumin vawhin na at ding uh a, ^r
lenggui suanin a gah na ne ding uh hi. ^s
31 A baanglai Judah innkuante in khatvei a nuai-uah
zung kha kikin a tungah gah a gah ding uh hi. ^t
32 Ahang in, Jerusalem panin a baanglaite paikhia ding uh a
Zion Vum panin a suaktate honkhat a paikhia ding uh hi.
Thahatpen TOPA deihluatna in
hih a tungsak ding hi. ^u

33 “Tua ahi ciangin Assyria kumpipa tawh kisai TOPA gen hih ahi hi:

“Amah hih khuapi ah lut loin
hih lai-ah thaltang khat zong a kap kei ding hi;
a mai-ah a lum tawh pai loin
umcihna panmun a bawl kei ding hi.
34 A kuanna lampi mah ah ciah kik ding hi; ^v
amah hih khuapi sungah a lut kei ding hi,”

TOPA in cikhia hi.
35 “Kei le ka nasempa David khualna-in
hih khuapi dalin ka honkhia ding hi,” a ci hi. ^w

36 Tua ciangin TOPA vansawltak paikhia a, Assyria-te giahphual ah mi tulza le tul sawmgiat le nga a that hi. A zingciang mite a thawh uh ciangin tua lai-ah misi-luang vive na om hi! 37 Tua ciangin Assyria kumpipa Sennacherib in giahbuk phelin a nung kik hi. Amah Nineveh ah ciahin tua lai-ah a om hi. ^x

38 Ni khat biakinn ah a pasian Nisroch a biak laitakin a tapa Adrammelech le Sharezer in a namsau un atlum uh a, amaute Ararat gamah a tai uh hi. A tapa Esarhaddon in a kumpiza a luah hi.